今晚上演曼市打吡戰，小弟同牽牛兄都想分享少少對曼市雙雄嘅睇法。小弟覺得摩連奴（左）無愧係「特別的人」，佢係個夠膽公開批評自己球員嘅主帥，據我記得，今季俾摩帥公開插過嘅球員至少有米希達利恩、基斯史摩寧、勞基梳爾（右）、安東尼馬迪爾等，但摩佬唔係踩完就雪佢哋，跟住係會畀機會佢哋踢番好。
球壇好多教練都唔會點名鬧球員，因為普遍認為喺公眾前面，教練要企喺球員嘅一邊，就算鬧，都係閂埋房門鬧。不過摩佬今季喺曼聯就多次公開鬧球員，但未見有將帥不和嘅事發生。數今季俾摩佬鬧得最多嘅，應該係左閘梳爾，叫佢加倍努力訓練先有得踢；鬧得最甘嗰次，係話佢冇腦，喺球場上每個決定都要摩佬教佢。小弟以為梳爾一定嬲嬲豬，點知佢出嚟話摩佬鬧得啱，要更加努力。梳爾咁虛心，季尾開始得到重用，正選機會多咗好多。喺上星期場歐霸盃，梳爾更踢足120分鐘，加時嗰陣雖然抽住抽住咁踢，但都堅持到底，賽後獲摩佬盛讚。梳爾係曼聯速度最快、助攻力最強又係最有活力嘅左閘，如果佢真係可以喺摩佬教導下開竅，會對曼聯左路有好大幫助。踩完你，再畀機會你踢番，呢類故事喺今季曼聯不斷出現，好似米希達利恩季初被摩佬雪過，話佢要貢獻更多，到季尾獲得重用。唔通呢種係摩佬練兵嘅特別方法？
文：咖喱