3月份旅客量又升咗，旅發局主席林建岳噚日公佈整體旅客量升8.8%，過夜旅客升幅超過一成，旅發局乘勢推出新節目「舊城中環」推廣上環至中環一帶新蒲點。
度橋盛惠740萬元
Sell深度遊當然要搵本地遊專家活現香港幫手度行程，去必列者士街古玩店Select 18尋寶、去PMQ後面樓梯街同石牆樹connect、仲有唔少得去各大塗鴉牆打卡呃like等，旅發局印咗28萬冊書畀大家免費睇，仲會喺旅遊點加指示牌同QR code介紹背景。成個project盛惠740萬元，遲啲仲打算推廣去灣仔呢類舊區㖭。
八方就覺得唔少舊中環景物一早人去樓空，先唔講大館話保育但塌咗，有集體回憶嘅皇后碼頭、天星碼頭鐘樓已拆，連嘉咸街露天市集80年老店永和號、69年歷史新景記粉麵家都因為重建被逼走。中西區關注組召集人羅雅寧話市集今非昔比，拆樓又嘈又多車，行都唔舒服，中央仲起棟幾十層高大廈，破壞舊市集氛圍，佢話其實舊中環區拍得住澳門舊城區咁有睇頭，人哋就世界文化遺產，中環就nothing，搞成咁政府絕對有責。
