臨近季尾，自不然有好多今夏轉會新聞，曼城注定四大皆空，係哥迪奧拿（左）執教生涯首季食白果，𠵱家只望保住前四，不過曼城使咗咁多錢搵哥帥返嚟，一眾高層仲係哥帥啲朋友或者巴塞舊部，小弟就唔信曼城油王今夏會炒佢，仲傳聞預備揼2.5億鎊（約25億港元），等哥帥執過晒陣容，𠵱家傳話想買迪利阿里同阿歷斯山齊士等英超球星。
以曼城𠵱家嘅攻擊線，個人認為仲完整過車路士、曼聯等豪門，仲屯積唔少快翼，史達寧、利萊辛尼、奇雲迪布尼、洛尼圖等都好打得，仲可以將拿斯尼外借至西維爾，今夏再買多幾件返嚟，真係唔知哥帥點排。好多都批評哥帥排陣、臨場調動冇料到，不過佢將捷西斯拿華斯（右）改造成右閘，都算係幾成功。
小弟與戰友咖喱成日笑捷西斯得一招，事關呢位西班牙前國腳只係右腳單蹄馬，成日靠一兩吓碎步變速然後出波，又冇假動作，落點又差，除咗博到好多角球，打右翼真係作用不大。曼城右閘退化問題幾大，薩巴列達同沙格拿都老，哥帥諗過轉打三人防線，效果亦都差，將捷西斯改打右閘，又可以適時助攻，防守力亦唔錯，都叫做改造成功。其實翼鋒改閘位成功例子都唔少，古有阿仙奴嘅羅倫，現有巴塞隆拿嘅沙治羅拔圖，見到捷西斯搵到出路都戥佢開心。
文：牽牛