候任特首林鄭月娥喺選舉期間，頻頻爆出多場「關公災難」，專責林鄭公關嘅主將、世聯行政總裁麥黃小珍，盛傳開價月薪18萬元，最後被壓價下都收取約10萬元月薪，合共獲支薪約32萬元。
到底值唔值？似乎都係「常識」，有份參選但未能成為候選人嘅新民黨主席葉劉淑儀就好坦白，佢話林鄭嘅公關團隊「掠水好深」，可能知道好多人爭住捐錢畀林鄭，唔知林鄭對姐姐葉劉肺腑之言，感受又深唔深？
由屋企冇廁紙去便利店又買唔到，到捐500蚊畀疑似違規來港行乞嘅婆婆，再到林兆波嘅愛的宣言會扯到去一國兩制，以及因為太攰唔去團體活動，相信大家對林鄭公關團隊嘅表現，自有評價，而葉劉重返行會前直諫，其實都係用心良苦，可能費事妹妹再被人蝦。
「恤衫成本廿蚊都唔使啦」
葉劉話：「佢（林鄭）嘅團隊知道林太籌到款，知佢收咁多錢；有乜理由嗰個Sandra Mak（麥黃小珍）收人10幾萬？你唔可以當林太係corporate (企業）咁計㗎嘛，佢（麥黃小珍）係冇election experience（競選經驗）……唔少嘢都報大數，我諗佢啲恤衫（T恤）成本廿蚊都唔使啦，啲人milk her（榨取林鄭）掠水囉！」
而葉劉自稱選舉開支好鬼慳；點解花咗1.8萬元喺化妝？佢解釋其實「冇咩特別化妝」，只係因為自己拍咗唔少短片，「去科學園、去南生圍，有個人跟住我，噴吓水，執吓防曬之嘛」。
葉劉噚日現身立法會時拐吓拐吓，原來佢話前日着衫時，突然坐骨神經痛復發，話以前喺美國都試過，諗住約做針灸治療喎！
李八方