據知候任特首林鄭嘅班子人選仲未齊腳，而局長下嘅副局長同政治助理毋須7月1日同時上任，仲有時間慢慢搵，唔少黨派已經向林鄭推薦心水，包括自由黨。
官場中人以為自由黨會推薦教育局前政助楊哲安重返政府，但最終副局嘅推薦人選卻係喺選委會中喺商界（第一）勝出做票王嘅中西區山頂選區區議員陳浩濂（圖），賣點係有選舉經驗又喺商界打滾，官場以至政界對佢評價不俗。
今年40歲嘅陳浩濂係港華舊生，密西根大學經濟學（榮譽）及心理學學士，2011年擊敗公民黨陳淑莊做區議員，2015年連任，舊年立會選舉於商界（第一）挑戰經民聯林健鋒高票落敗。
八方問過陳浩濂係咪獲薦入政府？佢話唔方便就黨方嘅推薦名單評論，現時專注以區議員身份服務山頂居民，同時喺總商會嘅委員會同政府中小企委員會服務商界，當然會做好喺投資銀行作為董事總經理嘅工作。咁願唔願意入廚房？佢話一如參選立法會目的，考慮以不同方式及專長服務香港，大家有冇從中參透到玄機？