近排本地傳媒多風波，最新一單係《明報》大老闆張曉卿（圖）早排盛傳中風，大馬嗰邊仲有傳媒寫到佢危危乎、好大鑊咁。世華媒體同萬華媒體噚日公佈，主席張曉卿病情穩定，𠵱家喺新加坡接受緊專科醫生治療，主診醫生話情况令人滿意，但勸告呢段期間要專心休養，唔好受到外界騷擾。
《星洲網》噚日報道張曉卿上周四接受治療，而佢細佬張翼卿代表家人向各界嘅問候致謝。不過無論報道定通告都冇否認或承認，現年81歲嘅張曉卿係咪中風，希望佢老人家冇咩大礙。話晒都喺馬拉嗰邊白手興家，集團業務涉足木材、棕櫚油、地產等等，佢當然亦都係當地傳媒大亨，控制咗馬來西亞4份主流報章，喺福布斯馬來西亞富豪榜入面排第9名，持有20億美元資產。
呢幾年《明報》經歷換總編輯、深夜改頭版等風波之後，總算平靜落嚟，一班行家可以專心工作，唔使再受不必要嘅麻煩阻礙。今次大老闆病咗，希望對《明報》唔會有太大影響。