今晚（26日）快活谷有兩項盃賽安排，其中先跑第四場四班1200米聖佐治挑戰盃，結果蘇偉賢馬房「競駿時代」大熱連捷捧盃，此駒由潘頓接手後兩戰全勝同班同程，人馬擦出最大火花，這次單Win及組合獨贏A1分別派36.5及23.5元。
老生常談北半球馬比較遲熟慢熱，來自英國的四歲自購馬「競駿時代」正是如此，本身上季在港出道表現低沉，今季卻越跑越好，繼上次初配潘頓即於谷草1200米爆半冷開齋後，呢鋪人馬合作乘勝追擊得手，雖負130磅及9檔欠佳，但仍一早切入守第四位好位，直路加速小勝「敬無極」頸位，再下一城。此駒不斷進步，加分後下次即使轉戰三班，惟負輕磅仍有機會於谷草拼勝。
「競駿時代」馬主競駿會有限公司出名人多勢眾，這晚勝出盃賽，場面更加充滿歡樂。蘇偉賢表示「競駿時代」已開始適應香港水土，狀態越來越好，今場對此馬其實沒有上場咁有信心，因為9檔不利，好彩潘頓發揮出色，留放一流，盡顯功力。蘇偉賢認為「競駿時代」忠心準繩，快活谷比沙田好，希望加分後仍有好表現。
另外，蘇偉賢又感謝競駿會成員給予耐性和時間等待，因為「競駿時代」之前未成熟表現一般，好彩一眾成員體諒及理解，並期待將來再有機會訓練競駿會的馬。
第四場前四名冷熱互見，亞軍由冷馬「敬無極」後上拎到，第三名是有飛馬「放下自在」，第四名則由落重飛冷門「神速寶」跑獲，四重彩派五萬四千幾。