法國5月藝術節同康文署破天荒合作，喺香港文化博物館搞「羅浮宮的創想．從皇宮到博物館的800年」展覽，希臘出土嘅馬首雕塑（塑像殘件）、拿破崙徽號地毯等都係重點珍品，雖然展期有成3個月，但噚日展覽第一日開放都吸引20、30人排隊入場，有參觀者就話怕遲啲太多人嚟趁墟，寧願提早嚟參觀。
今次展覽分兩個展館同一個互動區域，放咗藏品嘅展館唔畀影相，雖然展區入面列明禁止攝影，仍有唔少人犯規用手機左影右影，由於有時人流較多，保安都冇佢符。
惟獨互動展區就可以影，所以唔少互動展品都成為拍攝對象，其中配合唔同香港場景，如搶包山、天壇大佛等嘅電子版「蒙娜麗莎」最受歡迎，唔少人輪流同佢瘋狂自拍。
輪流替換搶包山背景
咁啱放假嘅吳小姐話自己冇去過羅浮宮，所以有羅浮宮嘅展品嚟香港覺得好興奮，對路易十四嘅奢華藏品印象尤其深刻，佢話展覽都介紹咗昔日法國皇室點樣花巨額去支持同保育藝術，「可以睇番香港政府點樣啦」。佢形容以往嘅想法幾前衞，唔似得𠵱家香港吓吓講經濟利益。