陳茂波叫人去恩平浸溫泉，唔可以話係錯㗎，如果佢本身係恩平幹部的話。
如果佢本身係恩平幹部，推銷恩平，當然係有咁大吹咁大，超美趕英追日驅韓，再誇張都能接受。
但問題係，你係做緊香港嘅官員，雖然能力上唔覺得佢有資格做到財爺，但殘酷的現實，佢就係代表香港嘅財金官員。你一個香港官員，無端端出盡奶力咁去推銷恩平嘅溫泉，把鬼咩！
我知道，因為家陣要推銷大灣區，要力推中港融合計劃，但你都識講，係融合而唔係合併，合併即弱肉強食，由二變為一。融合係你中有我兼互惠互利。
你推銷人地嘅時候，有無諗過對香港嘅影響？
香港打工仔平時生活已經好艱苦，放假哪怕只得3日，都要飛去日本，吊頸都要唞吓氣㗎。波叔你點解唔可以體諒吓香港人想放鬆嘅心情，而係要連香港人放假嘅時間，都變成政治推銷時間呢？
香港人玩，都要有家國情懷、要有廣東省一盤棋嘅大格局觀？
最離譜唔係sell恩平嘅溫泉，而係佢話，香港人可以多D返大灣區江門肇慶去居住退休，仲話香港人會羨慕大陸樓價只係香港嘅十分一，而想返去定居喎。咁香港人就唔駛局限係1100平方公里咁話。
波叔，你作為香港官員，講出這種「搬屋撤退逃離」嘅呼籲，可謂倒自己米、趕自己客，等於宣布以梁特為首的舊政府、以及林鄭為首既新政府，都無能力管好香港這個城市，無辦法令到香港人可以在自己的土地安居樂業。香港人有家歸不得，因為買唔起樓，只能搬離香港，走入大陸，尋找十分一樓價的黃金寶地。
財金高官明知香港樓價貴到香港人已經住唔起，束手無策，繼續縱容囤地，沒有解決問題的方法，只好解決問題本身──住唔起香港樓的人去江門吧！
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw