靚仔本地騎師梁家俊對上兩次賽事停賽，被太太阿Kit李潔瑩挾咗去關島玩幾日，家俊仔出海仲釣到大魚，阿Kit就大解放，將自己比堅尼相po上網。
玩完過後這晚（26日）谷草梁家俊刑滿復出，即有收穫，第三場四班1200米，首次策騎霍利時馬房「喜菜」即贏，呢匹意大利自購馬第17次在港上陣，爆11倍冷Win開齋，組合獨贏A2派28.5元。
與同主同廐馬「搖錢樹」一樣，「喜菜」原本一直由柏寶主理，前駒近期率先換人但未贏；至於「喜菜」呢次一換梁家俊即有脫胎換骨表現，2檔起步沿途前置，末段從內欄長驅直進贏0.75馬位，打開在港勝利之門。
這次同時是梁家俊季內首度勝出霍利時賽駒，今個月未完家俊仔已獲四Win。霍利時則表示快活谷跑馬，檔位起了關鍵作用，今場「喜菜」二檔及用梁家俊可減兩磅俱有利，馬兒亦比前更成熟進步，上場只得第五輸在比較早發力，今場留放恰當，遂可成功收復前失。
第三場二至四名分別為「日東昇」、「笑眼光」及「慷慨寶」，四重彩派四萬蚊多啲。
其中「日東昇」今朝從沙田運往跑馬地途中煩躁不安，左後腿有數處擦傷，最終臨場經獸醫評估後獲准照常出賽，可惜轉彎兜大圈蝕位太多，後上不及做二奶，幫唔到苗禮德馬房連同頭場贏「大爆發」在內起孖失敗。