某晚十一時許，一對相識兩日的男女，到旺角一烤肉店晚飯，埋單$2,200，有人要求AA制，雙方發生爭執還大打出手，結果兩敗俱傷，警方接報調查，二人被捕。押送男子上救護車時，他還爆粗罵記者，喝令刪相，樣衰又狼狽，何必呢？
這頓晚飯帳單二千多，除了什麼和牛之外，原來當中酒類佔較大部份，飲飽食醉心裏有數，怎能嫌貴？又撕爛女方鈔票？太躁了，酒精累事。
男女共聚，消費AA制也合理，不過卻不合情，約女伴食豪啲，女的有接受也有不接受，下列「三冇」凍過水：
（一）冇意思：有「意思」就話眉目傳情，借酒抽水，卿卿我我啫，但相談不歡，埋頭苦吃，吃出個禍來。若女方A A更是婉拒。
（二）冇下文：以為有「下文」？誰知冇，覺得唔抵，所以齋畀自己個份，以免吃虧──此乃「止蝕離場」。
（三）冇下次：做到咁盡，預咗不再發展，雙方行人止步，當然不肯投資。你說帶人上樓開埋酒，得像個男人，大人大姐為一千幾百吵鬧打架還見報見樣，都算cheap精了？是精甩尾的盤算？還是一場誤會？自己知。
男37歲女38歲，江湖歷練，都一把年紀了──也許這才是速戰速決的主因。就此「打」住。
別理報導兩日兩說法。
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw