講起用巴塞隆拿前鋒美斯撞面,大家都諗起香港影帝張家輝,不過巴西都出現假美斯,原來一位喺聖保羅糖果店嘅21歲男仔尼格拉路斯,因為個樣同阿根廷球王竟然有七、八成相似,每日都吸引唔少人去呢間糖果店朝聖。尼格拉路斯都話之前唔太認識美斯,朋友畀張相佢睇,自己都嚇一跳,仲話有機會會考慮同真美斯見一見面。話開美斯,巴塞總監羅拔費南迪斯就話,經過國家打吡勝仗,好有信心同美斯及恩尼斯達續約。