數數手指，原來下星期就係佛誕，又係時候入長洲睇一年一度嘅太平清醮搶包山。今年搶包山照舊5月4號凌晨零時喺長洲北帝廟遊樂場舉行。大會5月3號晚10點鐘開始，會喺長洲消防局隔籬免費派發1,650張比賽門券，每人只限攞一張，想入場睇嘅市民記得提早去排隊。
當局話，若果比賽開始前3個鐘天文台發出三號風球或以上、紅雨或黑雨警告，賽事就會取消，並以早前選拔賽成績決定名次，唔會重賽；過去亦試過臨開始先落大雨，喺安全前提下，最遲夜晚11點會有決定繼唔繼續比賽。
料6萬人湧長洲
除咗搶包山，日頭仲有飄色巡遊。長洲太平清醮值理會主席翁志明話，今年唔少飄色都以候任特首林鄭做題材，又話傳統打醮期間要齋戒，有七至八成商戶承諾當日唔賣肉或停業，食肉獸入去玩之前記得要留意。
運輸署就預計當日會有6萬人次入長洲，兩間船公司都會加強服務，其中凌晨1點15分新渡輪會加開特別班次接市民出中環。當晚凌晨1點10分至2點30分，九巴同新巴會加開104R路線由中環碼頭出旺角，而凌晨12點至2點30分就會有5條通宵巴士線改道途經中環碼頭，包括N8X、N90、N182、N619及N368。