呂健威馬房鎮倉寶「幸運如意」今季喺柏寶胯下連番搏失，一連四仗只得三亞一第五後，下月7號嘅1200米一級賽主席短途獎，換人已成定局！
不過，柏寶於今屆主席短途獎仍有望取勝，今朝柏寶策蔡約翰馬房「華恩庭」參加沙田第一組1000米草閘，全程按實紋風不動，刻意保留實力，跑第九名但走勢絕不差，似乎馬兒遠征杜拜阿喬斯短途錦標得第六後，狀態保持得唔錯，今課試閘後柏寶亦摸摸「華恩庭」馬頸，以示鼓勵。
柏寶透露蔡約翰日前邀請佢夥拍「華恩庭」出賽，佢馬上答應。柏寶同「幸運如意」分道揚鑣，一直盛傳由布文接手騎「幸運如意」，柏寶難免唔開心。
不過計實力「華恩庭」一啲唔輸蝕，上屆主席短途獎嚴重塞車，亦能跑第五只輸給澳洲灰色神獸「尚多湖」2.5馬位，加上柏寶騎過「華恩庭」兩次全勝，包括季初贏1000米三級賽國慶盃，人馬好夾。所以下月主席短途獎嘅機會，其實可以話同「幸運如意」不相伯仲。