人生有幾多個10年，可以喺同一間英超球會留效10年真係好難得。利物浦現役球員中效力最長時間嘅盧卡斯，喺07年20歲仔由甘美奧加盟紅軍，不知不覺已經接近10個年頭。佢喺周一設宴預祝10周年好日子，大量紅軍現役同昔日球星都畀面捧場，星光熠熠。想當年盧卡斯加盟紅軍嘅時候，當時隊友謝拉特同埋費托等，都已經一早離開咗球隊。當晚除左謝拉特同加歷查等昔日名將之外，仲有一班現時隊友好似菲臘比古天奴同羅拔圖法明奴等，領隊高路普亦帶埋支香檳嚟賀盧卡斯。
另外，喺英國好受歡迎嘅真人騷電視節目《冰上奇蹟》（Dancing On Ice），最近正籌備緊拍新一季節目，電視台方面有意搵謝拉特做嘉賓，到時球迷有機會睇到謝四玩滑冰。神奇隊長喺14年對車路士場波一跣就跣走咗個聯賽冠軍，今次玩溜冰就算喺場上跣低，應該都唔會畀人笑啩。