英格蘭東北部最著名嘅三支球隊，紐卡素、新特蘭同米杜士堡，自英超時代以嚟每季都至少有一隊喺頂級聯賽競逐，今季新特蘭同米堡踢到季尾都冇起色，睇怕下季英冠見。不過，東北三虎下季唔會完全絕迹英超，由賓尼迪斯帶領嘅紐卡素，喺周一英冠主場4:1大勝普雷斯頓，提前兩輪宣告鎖定直接升班英超席位，下季東北就靠晒紐記喇。
炒普雷斯頓直接升班
紐記喺周一英冠獨腳戲迎戰普雷斯頓，艾約斯佩雷斯喺開賽七分鐘就先開紀錄，雖然冇耐就被扳平，但紐記靠基斯甸艾素喺完半場前入波再次領先。到下半場馬特列治射入12碼，加上艾約斯佩雷斯攻入佢今場第二球，結果以4:1大勝。全取三分之後，紐記有88分在手，喺今季英冠剩番兩輪聯賽下已經領先第三嘅雷丁九分，提早鎖定頭兩名，下季直接升班英超。相隔一季即刻就重返頂級聯賽，粗略估計紐記今次升班會為球會帶嚟大約二億鎊（約20億港元）嘅收入。
或成下季唯一東北虎
紐記事隔一季馬上重返英超，好可能仲係下季唯一東北代表，因為今日會對碰嘅兩支東北球隊米堡同新特蘭排緊英超19、20位，相信好大機會降落英冠，不過紐記仲係咪由賓尼迪斯教，就冇人敢寫包單。肥賓喺上季英超季尾接任，可惜得番10場波畀佢教，最後都係救唔番。到今季肥賓喺季初頭兩場聯賽輸晒，之後越戰越勇最終完成升班目標，但喺季中曾傳出，佢不滿班主艾殊利喺一月唔肯放水增兵，甚至一度被傳打算走人。
鎖定升班之後，肥賓喺賽後被問到會唔會下季繼續帶領紐記，佢都係帶記者遊花園：「紐記班球迷真係好熱情，所以我喺上季之後決定繼續留低。現階段我哋應該好好享受一下勝利嘅喜悅，之後完成埋餘下兩場聯賽再作打算。我會唔會繼續留低？呢個真係好難講，足球世界任何事情都有可能會發生。可以成為紐卡素領隊係值得自豪嘅事，但往後嘅事就往後再算。」
同肥賓際遇有啲相似，09年季尾接手紐記救亡但衰咗，之後冇得留低嘅名宿舒利亞，認為肥賓來季留唔留低，取決喺球會肯唔肯畀足夠嘅錢去增兵：「現實係要喺英超生存，單靠一班升班功臣係唔夠，一定要增兵。至於球會要揀下季喺英超下游掙扎護級，定係有一定競爭力，相信賓尼迪斯一定希望係後者。」