中電信（728）旗下中國電信國際噚日宣佈同數據中心營運商Global Switch合作，估唔到Global Switch大股東Reuben兄弟都專程由英國飛嚟香港撐場，認真畀面。
查實佢哋來頭唔小，據《星期日泰晤士報》富豪榜，年逾70嘅David Reuben同Simon Reuben兩兄弟舊年榮膺英國首富，當時身家131億英鎊（約1,370億港元）。睇番福布斯全球富豪榜，兩位就排65位，目前身家167億美元（約1,300億港元）。
不過兩兄弟嘅故事頗勵志，白手起家，各自從廢金屬和地毯行業賺到一筆錢後，轉而投資地產同金屬交易，又大膽進入俄羅斯鋁業市場，逐步累積財富。
家陣佢哋涉獵嘅投資多元化，2004年成為Global Switch控股股東，並持有至今。David更話，現時大眾對數據嘅需求尚未完全滿足，相信數據會成為生活和工作不可或缺嘅支柱。