上星期英格蘭職業球員協會（PFA）公佈2016/17年度英超球季最佳十一名球員，目前英超聯仍未結束，但車路士與熱刺已在積分榜上領先，其他球隊似難以追上，冠亞軍不出呢兩隊。或者因為咁，十一名今季精選球員之中，車路士、熱刺各佔四名。車仔有一對中堅路以斯、祁曉，中場夏薩特、簡迪；熱刺有一對左右閘路斯、獲加，中場迪里，前鋒簡尼，餘下三個位置分別是曼聯門將迪基亞，利物浦中場曼尼與愛華頓中鋒盧卡古，阿仙奴與利物浦的山齊士及古天奴無緣入選。
球迷是否同意這張名單，係另一回事，左丁山唔係任何一隊嘅粉絲，保持中立，認為此份名單大致可接受，一位朋友係阿仙奴粉絲，就幾多牢騷，指山齊士可以踢中場或前鋒，可以代替利物浦嘅曼尼，同時又慨嘆阿仙奴今年大可能不入前四名，係雲格自1996年執教以來，來季第一次與歐聯無緣，恐怕山齊士會因而下堂求去。佢話雲格做咗21年教練，近幾年一直與冠軍無緣，理應炒魷，或者仁慈一啲，升佢上神枱擔任球會文職管理高層，畢竟一個人在位太久，就不利機構新陳代謝及帶來新觀念，令機構停滯不前。
人總有退下來的時候，雲格今季唔走，聽聞還會再簽兩年合約，阿仙奴球迷會多激氣兩年。雲格係著名領隊中罕見人物，不是著名球星出身，而係少數讀完大學得經濟學學位嘅蛋頭，故在球圈有「教授」外號，佢早期領導阿仙奴攞英超冠軍，全季保持不敗，係一個難得紀錄，但佢對阿仙奴嘅最大貢獻係「守財奴」，掌握球員買賣及加薪大權，堅持低買高賣，專門以較低價買入年青球員，到成為球星接近三十歲時就沽之哉，經典例子就係亨利與法比加斯，令阿仙奴經常在球員轉會市場獲利，憑佢嘅謹慎理財方法，阿仙奴成功興建新球場更大更靚，雖然所費不菲，但已經憑着每年球會充足現金流償還債務，令阿仙奴成為英超財政最穩健嘅球會，亦令到阿仙奴股價連連上升，睇吓曼城、曼聯、車路士嘅財政，利物浦正辛苦集資興建新球場，你就明白點解阿仙奴董事會錫晒雲格。但雲格有一大弱點，就係除咗亨利、法比加斯外，無法培養英國本土新秀成為成功球星，尋且成為瘀血㖭，例如韋舒亞、藍西、禾確特、張伯倫等最初星光四射，十幾歲時滿懷前途寄望，在雲格調教下多年來竟然全無進步，日益消沉，雲格實在難辭其咎，早早趁還有光環退位讓賢啦！不過佢可能仍有運氣，上星期日足總盃四強準決賽，阿仙奴對曼城，竟然應輸不輸，捱到加時下半場憑山齊士入球，以二比一絕殺曼城，將會與車路士在5月27日爭冠軍。如果又夠運贏埋，雲格仍有排玩。
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw