去日本想試和服、去韓國想試韓服，原來香港都有傳統服飾體驗！一班台灣旅遊業代表日前去中環「嫣裳記」租旗袍，380蚊就可以變身《花樣年華》嘅蘇麗珍，穿梭蘇豪區影相留倩影。
旅業代表率先試影靚相
旗袍流露女性誘人曲線，但剪裁貼身又難襯，一向蝦人着。一班台北旅行社代表就挑戰着旗袍同長衫，十幾人大搖大擺遊走街頭好吸睛。試着嘅百威旅遊港澳線副理曾瀅如話，旗袍質地唔算厚，夏天着都OK，最重要係有彈性唔會爆呔咁老尷，動作大少少都冇有怕。
佢同成班行家着旗袍長衫行過卑利街塗鴉牆、懷舊酒吧吱吱斟同老店公利真料竹蔗水打卡呃like，其實佢哋係應旅發局邀請來港，任務係為台灣消費者，搵吓香港有咩新景點新嘢玩。
ezTravel大陸及港澳部總監陳秋如就話，台灣人訪港通常玩3、4天，消費約1萬台幣（約2,500港元）。
台北市長柯P話香港冇嘢玩喎。雄獅旅遊自由行部協理蘇世欣就話，以前台灣人來港鍾意shopping，但好多品牌已經進駐台灣，台客當然轉晒focus玩香港嘅深度遊啦！既然旗袍體驗有文化又咁多趣，八方覺得一於sell畀台灣旅客玩吓，等多啲台妹嚟香港打卡都好吖！