體壇拾趣：
橫掃拓荒者　勇士笑唔出

勇士周一順利以128:103擊敗拓荒者，橫掃對手成為NBA西岸首支晉級季後賽次圈嘅球隊，不過球員就未必笑得出，事關教練卡爾（Steve Kerr）背傷復發，今場已經無法督師，仲好大機會唔可以喺餘下比賽領軍，勇士靠助教米克布朗（Mike Brown）頂上又得唔得呢？
勇士賽前已經宣佈，卡爾周一第四戰未能督師，好彩將士用命，史堤芬居里（Stephen Curry）攻入37分，杜蘭特（Kevin Durant）啱啱傷癒復出只打20分鐘，都貢獻10分，幫勇士以25分擊敗主隊，總場數4:0晉級，次圈就會鬥爵士或快艇嘅勝方。

卡爾背傷復發有排搞

勇士早早出線，應該有一星期休息，但卡爾情況就唔多樂觀，佢接受訪問時話前年手術後，脊髓液滲漏嘅問題嚴重影響佢，而且用過好多方法都冇改善，會方都預計唔到佢嘅復出時間。勇士家陣由助教米克布朗帶隊，佢做過騎士同湖人嘅主教練，經驗都算豐富，而且勇士上季初卡爾缺陣嗰時，由當時助教禾頓（Luke Walton）暫時接手，都打出開季24連勝佳績，所以暫時未有浮現問題。