民主派4名議員為回應政府主張要為社區「創造容量」嘅「香港2030+」策略，日前就兵分三路，真人實測唔同返工交通方法利弊，希望喺盲目移山填海以外，搵到為香港路面「創造容量」嘅方法。公民黨飛機師譚文豪戴上有拍攝功能的頭盔，測試早上7點由太古城搭港鐵返立法會要幾耐，最終包埋步行全程要31分鐘，8點繁忙時間就要成35分鐘先達。
「專業議政」郭榮鏗就同姚松炎拍住上，由太古城踩單車返立法會，發覺朝早時段路面算暢順，可惜香港馬路未有單車綫，所以踩車時特別小心，全程用咗50分鐘。至於公民黨AY楊岳橋就最嘆，示範揸私家車由太古城返立法會，發現7點開車要用21分鐘，8點開車就要用32分鐘。
雖然揸私家車最舒服，但班議員計過，原來每月要用成6,530元，比起港鐵335元，同唔使錢嘅單車，真係差好遠。難怪郭榮鏗試完都話日後會少啲揸車，好天時會多踩單車同搭港鐵返立法會。
呢段片最終擺上facebook 5小時，已有近7萬人睇過，仲有超過2,000個like，都算幾受網民歡迎。
譚文豪戴頭盔俾人笑
有份參與拍片嘅AY就同八方透露，套片希望講出踩單車慳錢又健康，係相當唔錯嘅返工方式，可惜香港城市規劃冇預單車，希望今次可以啟發大家有唔同嘅交通選項。
AY又話，譚文豪要長時間戴頭盔拍攝，惹來唔少乘客笑聲，佢自己揸車，係因為自己踩單車唔太叻，郭榮鏗同姚松炎就係單車愛好者喎。
李八方