一手旺場，代理佣金收入亦豬籠入水，派花紅回饋員工都好應該。四大代理行之一利嘉閣，3月份佣金收入逾2.3億元，創下公司單月新高紀錄，噚日就公佈發放2017年第一季花紅畀超過300名後勤員工，總裁廖偉強話，花紅總數超過300萬元。
廖偉強話，公司將會發放約0.45個月同0.68個月花紅畀主任級或以上後勤員工，高級管理層更可獲發放平均約1.97個月花紅，當係答謝全體後勤員工一直以來嘅付出同努力。
不過，派得最勁唔係今次，廖偉強話試過最勁一季派到差不多500萬元。就以舊年第三季，主任級或以上發放約0.65個月及0.98個月花紅，而中高管理層更獲發放最多3.82個月花紅，即係中高管理層今次袋少大約一半花紅。