本地華人騎師長期處於下風，其實佢哋成績不及過江龍，與座騎實力較遜大有關係。
雖然昨午（23日）沙田馬場有馬跑，但朝早就見到四位華將們一齊出動操馬，包括蔡明紹、黎海榮、蘇狄雄及吳嘉晉，佢哋可謂謹守崗位做足本份。
練馬師方仔方嘉柏以行動證明自己其實好支持本地薑，尤以自己徒弟何澤堯為甚。周三晚（26日）佢全數八場谷草夜賽都有馬出，並將其中五駒交俾徒弟仔何澤堯策騎出賽。難得師傅委以重任，何澤堯一定會使出渾身解數，務求以頭馬鞏固自己在師傅方嘉柏心目的地位。
其中出戰四班1650米賽事的「全勝姿態」，近兩仗全跑同程同班都係由何澤堯執韁，先跑入一席季軍，再出成功克服外檔不利形勢補中，人馬可謂擦出火花。
賽後操練模式同上仗贏馬大同小異，今次再配何澤堯跑四班谷草一哩，毫無疑問呢匹馬會係方廐周三夜賽爭勝本錢。