【奇妙電視】有線寬頻旗下的免費台奇妙電視，將於下月14日正式開台，加入免費電視台的競爭行列，昨日有份為奇妙拍節目和劇集的藝人，包括杜汶澤、林耀聲、黎燕珊和何傲芝等，拉大隊齊集中環拍攝宣傳片，為奇妙開台壯聲勢。
其中由杜汶澤孭飛的飲食節目《杜汶澤食住上》，安排於下月20日首播，作為開台主打節目之一，問到會否添食拍part 2？阿澤自嘲是師奶仔：「我都要拍戲喎，我煮唔到咁多個餸，再搵我先算啦，其實壓力大嘅，但唔關開台嘅問題，而係煮餸我覺得好難，我又唔係真係叻，有好多高手，我呢啲師奶仔又未去到米芝蓮，煮得唔好食就唔好意思啦。」
鄭融首擔正
節目將有12集，貴精不貴多，阿澤笑說：「希望嘉賓食完冇事，我都係志在煮畀大家食啫，希望大家食得開心。」問到會否再研發新菜式？他說：「節目之後呢，自己真係喺煮食方面畀心機，煮完又想同大家分享，但分享又有壓力，因為驚衰。」
此外，曾為ViuTV拍劇《瑪嘉烈與大衛系列 綠豆》的林耀聲，將為奇妙拍新劇《熱戀100天》，內容講大學畢業後的他仍住宿舍，跟李靜筠相戀的故事，問到兩邊電視台走，他說：「係呀，乜嘢都試吓。」首次拍劇《閃婚100天》的鄭融說：「自己未試過拍劇，之前學演戲課程，奇妙用電影拍攝手法，效果好靚，自己第一部劇好期待，加上未做過主角，自己愛上演戲，但唔接受閃婚。」
Coffee講兩性
林芊妤（Coffee）着粉紅露肩裙現身，她說：「我個節目叫《吾男吾女》，講兩性話題如偷食、忘年戀，唔係核突，仲有男主持樓南光，探討問題時成日嗌交有火花。」對於ViuTV有類似節目《晚吹》，她說：「其實Viu嘅尺度大啲，我哋比較探討內心，適合小朋友睇。自己冇乜壓力，開台畀大家多個選擇。」
採訪：黃曉妍
攝影：陳慧安