工已收，飯在吃，公關老友C小姐還是嬲爆爆，不停抱怨老闆有公關潔癖，過份地小心眼，眼裏容不下一粒沙，不惜要她花不成比例的精力，也把最後那幾點塵埃都抹凈，才肯勉強收貨，叫她每感疲於奔命，身心俱攰。
明白的，明白的，世上總有這種玻璃心老闆，面皮之薄，吹彈得破，坊間少少投訴，看成天一樣大，尤其當姨媽姑爹、行家老死都懶關心紛紛問候一番，要面的他自尊心加倍受損，條件反射就係按內線叫大秘書召公關入主席房，大興問罪之師：「搞乜呀，點解人哋話有人咁咁咁寫我哋，你哋仲唔去澄清番？」
Hmmmm，公關心中一千個問號： 咁其實邊個寫，幾時寫的呢？肯定唔係主流紙媒和網媒啦，係嘅話自己都mon到啦，畀啲貼士好喎。但係你個樣咁兇，點問好呢？
即使到最後，出盡洪荒之力，終於知道你講乜，但作為公關，真係好想話你知，在21世紀的今天，網絡之發達，意見評論散到一天一地，但能成氣候嘅，萬中無一，你不是真的以為有人可以在網絡上隻手遮天，連街頭巷尾那牆角都幫你徹底消毒吧？
強如「夢想辦」的阿聰，被林鄭點名後紅遍香江，氣勢如虹，近來亦不免樹大招風，惹來是非一場。其他政客、政團、企業、品牌，有粉絲之餘亦必有日日夜夜𥄫住你一言一行的一小撮 die hard 敵人，他們總能在雞蛋裏挑出骨頭，朝咬夕噬，想叫你寢食難安，過分認真你便輸。
冷靜啲，抽離啲，從大局看，你覺得應該用精神時間為佔大多數的粉絲提升服務，還是應該被一小撮職業打手牽著鼻子原地兜圈？
彭瑪莉
mailto:[email protected]