阿仙奴周日英足盃靠阿歷斯山齊士加時建功，以2:1搞掂曼城，殺入決賽，賽後最多人討論嘅，就係「永續雲格」四個大字，內地傳媒仲形容英足盃就好似「保（溫）杯」（內地譯溫格）一樣。
教授仲畀人影到佢完場即振臂慶祝勝利，賽後又好感慨咁話終於守得「雲」開，睇嚟季尾食粥食飯，離廠定留廠就睇呢個盃，但決賽對手車路士嘅名宿杜奧巴就大潑冷水，講笑話要返車仔，將自己對兵工廠嘅入球紀錄增加到17場入17球。
另一邊輸波嘅曼城就慘喇，主帥哥迪奧拿高調入主，點知首季就四大皆空。佢就正面咁話將焦點放喺周四場曼市打吡度，希望重返勝軌。
