舊年中國樓市旺，唔少內房銷售爆晒數，獎金花紅好和味；國企中海外（688）合約銷售都升咗17%，但公司高層明顯冇份enjoy成果，連11月中升做主席嘅肖肖，舊年人工都係舊價，總年薪由836.6萬元，升1%到845.3萬元。
大家咪以為國企大大隻，市值下下過千億，做得國企董事，人工好睇好食。以往唔少媒體都報導過，連國家主席習近平年薪都係得2萬幾美元，即係一個月得萬幾蚊港紙，又大大聲話打貪，又話要還富於小股東時，即使已經衝出海外上市嘅國企，一樣受規範，等於半個公務員，人工邊有得郁吖，有幾百萬一年都算係咁喇。
相反，唔坐Board嘅高層就唔同嘞，佢哋好多管住一個銷售大區，好似華北區、華南區咁，上市公司表現要睇佢哋表現，呢班區域老總嘅人工隨時高過董事呀。