按證公司宣佈推出年金計劃之後，年金忽然成為大家茶餘飯後的話題，有人覺得放低100萬元，每月收取約5,000元至老死，十分安全划算；專業股民當然覺得自己用100萬元炒股，賺double都唔止，何需經按證之手；坊間亦多人提及自製年金組合。趁後生自製年金組合當然是好，但需要5個條件配合。
1. 患上失憶症
自製年金的重點是要長揸，說的是廿年以上，許多人早上買了某隻股票，下午見到跌兩格就憂心忡忡打算沽，令人O晒嘴。若果你決定自製年金，就要買完即忘，不要得閒無事望股價。
2. 慎讀投資專欄
投資專欄有參考價值，讓人貼市，知道市場熱話，但不少投資專欄今個星期叫人衝入市掃貨，下個星期見大市回調又叫人減磅，如果跟車太貼，只會令人精神分裂兼血壓爆標。
3. 讀十年財務摘要
部份人連港交所（388）網站都未去過，叫人買股前細讀上市公司年報，實在嘥氣。速食方法，是望一望年報內的十年財務搞要（只是一個大表）。透過買高息股自製年金，起碼要知上市公司的派息紀錄，盈利與股息是否穩步增長。如果你連睇表都懶，就算吧。
4. 買吧
所謂講多無謂，行動最實際。世上最無奈的事，是你十年前推介一隻幾蚊的股票，十年後見隻股升到變紅底股，但原來你一直停留在「睇好」階段，從來無買！另一種無奈，是你見到朋友每年有4厘股息回報，得閒無事又收特別息或紅股，你只有說「你就好喇」的份兒。
5. 儲錢
投資第一步永遠是儲錢，儲錢不是將你每個月花剩的錢儲下，而是一出糧，便撥出一個百份比去儲，如果你想去旅行，唔該你再撥一個百份比去儲，平時不妨多讀《螞蟻與蟋蟀》的故事。
以上幾點全是阿媽係女人，「唓」之前，想一想你做到幾多點？
高淑嫻
https://www.facebook.com/koc9nine