𠵱家部份商場嘅室內停車場都可以透過手機應用程式獲車位資訊，但路旁泊位咪錶嘅實時空置車位資訊卻缺乏。IVE智能手機軟件開發高級文憑2年級學生何百祥就同何英瑋及梁嘉龍，設計尋找全港咪錶嘅手機app「EZ PARK」，由構思到完成設計耗時個半月，最近喺業界主辦嘅「JOS Innovation Awards 2016-17」勇奪金獎。
程式應用要喺咪錶裝置超聲波感應器，當感應到有車位空置，訊息透過雲端傳送顯示資料，EZ PARK可以顯示10公里內嘅空置咪錶位置，仲設導航系統指示司機，亦能標明各類型車輛嘅車位位置。由於設計涉及嘅咪錶屬政府資產，團隊希望可以同政府合作。
另一IVE學生陳子君則喺「最佳智能眼鏡應用程式開發大賽」，設計出籃球比賽計分智能眼鏡應用程式「BKstat」，獲實踐組大專組別冠軍。佢話籃球聯賽對數據統計要求好高，但每場賽事僅一至二人以人手計分，同時要留意球賽情況，容易顧此失彼，BKstat就利用英文語音功能系統輸入數據，戴上智能眼鏡後，從眼鏡就可見以圖表顯示嘅計分資料。