同門竟然因為林鄭相殘？都係因為林鄭一句話所致。話說林鄭表明考慮研究重開公民廣場，唔少黨派都拍爛手掌歡迎，民建聯梁粉劉國勳更去信林鄭表明立場，之但係民建聯嘅兩位副主席企鵝男張國鈞同喊鼎鼎周浩鼎，其後接連開腔為即時重開降溫噃，係咪點都估唔到林鄭成功分裂咗建制陣營？
回帶睇一睇，公民廣場嘅風波源起，可能係林鄭未當選前接受《蘋果》訪問已話考慮重開，佢當時透露辭任CS前都反覆考慮重開政總對出範圍，但基於保安理由決定暫時封閉，若做特首則樂意再同保安同事研究，「係咪仲有咁重大保安理由，要將呢個建築物本來係開放式，變成現時較封閉式？」
林鄭：上任先考慮
林鄭呢句話，公民廣場頓成熱話，劉國勳其後去信現任CS促重開，皆因佢一直支持門常開，各黨派亦喺林鄭上場後先後開腔，建議藉此展示新作風，殊不知卻喺民建聯內部惹爭拗。
繼日前副主席張國鈞拒以公民廣場稱呼「政府東翼前地」，噚日輪到另一副主席周浩鼎為事件降溫，表明黨團討論過後有共識，就係應該先做好保安風險評估再重開，仲話好擔心出現示威場景，不得不有保安考慮，指林鄭不急於匆忙建議，一頭冷水照頭淋黨友。
但劉國勳勇者無懼，噚日同林鄭見面時，再當面提及重開公民廣場一事，八方問過佢，佢話黨員有唔同意見係好正常，證明個黨歡迎討論。候任特首辦發言人回覆八方時重申，林鄭會喺正式上任後考慮有關建議。
有建制花生友則話，雖則林鄭被指「CY 2.0」，但作風較open，之前突然話擱置TSA，已將建制派殺個措手不及，君不見民建聯同工聯會都冇參與民主派趁林鄭開腔而乘勢發起嘅跨黨派聯署。由於未必同建制陣營咁同聲同氣，建制料日後林鄭嘅建議，除咗政治議題外，或者同民主派接近。
李八方