彭浩翔執導、楊千嬅及余文樂主演的新片《春嬌救志明》前晚在又一城舉行首映禮，吳岱融和鍾淑慧夫婦、余香凝、廖子妤、連詩雅、邵音音及梁漢文等現身捧場。《春嬌》後日正式上畫，前晚所見戲院其中兩間院的預售票已爆滿，不過彭導仍不太滿意，竟衝口而出：「吓！得兩場咋？」樂仔即安撫說：「低調啲，唔好咁，已經好好㗎啦！好少提早咁多日預售，多謝院商支持。」
帶Torres見嫲嫲
千嬅自言以平常心看待票房，樂仔則不談票房，認為最重要是口碑，觀眾需要喜劇，睇完戲可以心情愉快地離開戲院。彭導籌備《春嬌救志明》時，聲稱有周潤發及鍾楚紅加盟，最近被翻舊賬指食言，他強調：「我諗咗好多計劃，但從來冇公佈過會有發哥，但發哥好支持呢部戲，我本身搵咗里安納度狄卡比奧（Leonardo DiCaprio）替身，但片長關係，剪咗，太多好笑嘅場面，要忍痛割愛。」
最近有報道指樂仔以月租12萬在赤柱築愛巢和女友同居，樂仔起初不願置評，但千嬅和彭導相當好奇追問他，千嬅更笑問：「做乜唔畀我哋住呀？我哋付出咁多。」彭導亦說：「係囉！我拍到你咁好，租屋畀我住都好應該啦！」樂仔否認是同居愛巢，因女友居於台灣：「我買唔起惟有租囉！」提到千嬅囝囝Torres日前和嫲嫲現身馬場，千嬅說：「嫲嫲想見吓個孫，所以帶咗佢去，Torres唔知馬場係乜，只知係family day，唔會講佢聽賭馬，只係一個比賽。」
DaDa恭喜Moka
同場的陳靜（DaDa）曾經和方媛（Moka）一起去看郭富城演唱會，如今Moka貴為城嫂，DaDa指事前並不知情：「我哋以前同公司，但唔係成日見，婚事開心事，有恭喜佢，我都係睇報紙至知佢結婚，唔知係咪雙喜臨門，我哋好少聯絡，又唔係閨蜜，只係同事，當時佢喺香港冇乜朋友，我盡地主之誼，關心吓佢。」她自言單身了多年，暫沒想過要結婚。
採訪：黃曉妍
攝影：沈健程