每半年一次嘅「一田優惠日」下月26日舉行，粉絲留意番，沙田總店局部裝修中，最快明年全部完成，怕唔夠地方，一田就租咗九展近5.2萬呎地方做優惠日，但九展個場冇得賣最受歡迎嘅篋同新鮮貨。
大家都知道，來回九展，坐接駁巴士係最方便，一田行政總裁（CEO）黃思麗（Susanna）講明，到時每20分鐘就有一班接駁巴士，往返沙田新城市廣場3期至九展。正正因為要坐接駁巴士，大家冇可能拎住篋上車，所以即使有咁大地方，一田都冇安排擺篋喺九展賣，但其他一田店照有得賣嘅。
至於大家最關心，當然係到時有幾多折優惠，Susanna就話，今次優惠日嘅貨有兩至三折，九展仲會提早一日（即係5月25日）開始舉行優惠日，部份仲係一折筍貨。問佢有乜心水貨，佢講笑咁話，舊年冬天力推嘅羽絨好得，今個夏天就可能有泳衣，佢講笑話，佢可以着羽絨做示範，泳衣就唔會着喇。