係同胞嘅，注意：
有人話大灣啲溫泉正，唔使去日本浸咁話喎……
齊鼓掌，熱情又漂亮，咁就好囉；日本咁遠，又要坐飛機，日後港珠澳大橋為你、你、與你並大灣打造；近、直接、交通費用便宜。想得到，國內定然做得到：威尼斯、Portofino、托斯干納、巴黎……邊個歐洲名城不被祖國同胞成功克隆？打造AA貨？
日本啲溫泉真係好普通啫，廣州從化、台山古兜啲溫泉點會差得過？
日本人又禮素繁複兼奄尖腥悶，乾淨到鬼咁，規矩多多，俾啲下人做咪好咯，我地同胞嚟消費，打救你地，有益你地經濟嘅大爺嚟㗎，仲要我地守規矩？
留喺國內消費幾有面子啊？簡直吃餃子，咬一啖，就地扔一個，咬兩啖，就地扔兩個；等啲下人、隨從跟在身後，隨行隨執拾，做大款、顯威風！
台北北投、烏來都咪去囉，聽講：溝鹽㗎咋，點有咁多天然湯？
嗱、嗱、嗱，咪搞台灣回歸大和榮民魂呀吓；溫泉，就係溫泉。
湯？湯你條命！
就去大灣，聽高官話，必有益你因由，你就信啦！
千祈咪再去日本啦，留國消費光榮，謝謝、謝謝、謝謝，多謝晒！
唔啱搬入大灣住？
唔住入國內、真係笨！
住國內就盞鬼囉，啲屋門口高大、內有狗都惡，好威水㗎；高官都係咁講，有着數㗎！
前特首曾蔭權……後來？
後來唔好講佢，講本來！
本來夏天風涼水冷，冬天暖笠笠，入住深圳萬萬萬聲一平方，最近價格更飆升高級豪宅，寧願長作嶺南深圳人，千幾年前白居易已經So, so Avant-Garde，預言高官、包括皇妓楊貴妃：「長作嶺南人」！
有典有故，大灣熱烈歡迎你，等你。
真係多謝高官咁有智慧，咁有遠見，咁識貨。
嫌香港細、悶、冇嘢頑兼唔夠北京首善之都，上海高且貴嘅每日單程一五○，台北柯B同類……特首、高官帶頭醒你，益街坊，大灣等住你、你、你！