這天（23日）沙田日馬戲肉，是第五場香港賽馬會社群盃一班1400米，只9駒落場全日最少。結果又係盃王大摩天下，佢憑「彩福」爆冷勝出呢項盃賽，兼季內首次與華人騎師何澤堯合作贏馬，至於「彩福」落重飛啡燈出擊得手，單Win及組合獨贏A3分別派103.5及39.5元。
大摩今場雙龍出海，旗下「彩福」與「人民武士」都負極輕磅，其中田少田北俊愛駒「人民武士」末段一度從外叠望空殺上看似贏得，最終衝落虎頭蛇尾，只跑第四。
反觀「彩福」在新配搭何澤堯胯下，早段守三四位，直路在中叠越衝越勁，先追過「加州議長」，再力壓外側「永旺年年」勝出，爆冷取得季內第二捷，賽後由政務司司長張建宗主持頒獎。
「加州議長」最終輸鼻位影相飲恨做阿二，連贏搭頭馬「彩福」落飛着啡燈都有20倍，落飛黨此場WQ彩池合共純利約1,800萬元，和味過和味龍！今場三、四名由「永旺年年」及「人民武士」順序瓜分，四重彩派近三萬二千元。
「彩福」馬主譚少強說：「『彩福』我認為牠贏來好彩，同場有許多強手，我估不到牠今場有機會取勝，何澤堯發揮一絕，人馬表現出色，我認為牠已加了許多分，再出能否再交出成績，要睇際遇。」
另外，兩倍大熱雷神莫雷拉座騎、榮智健愛駒「西方快車」直路衝刺力麻麻，只得第五。
五歲馬「彩福」由三位馬主共同持有，其中一人是四捷之全港最高分三歲馬「駿皇綵」的馬主譚少強。連同「彩福」今季兩Win在內，佢季內在港累積已六次贏馬，可謂旺氣迫人。