同大家闊別咗大半年嘅花生友返嚟喇！自從林鄭月娥3.26以777票當選特首，有關組班、管治同各界connect嘅消息滿天飛，花生友係時候復出，同大家分享吓禮賓府首位女主人登基前嘅風聲。
喺當選一個月前夕，林鄭開始有大搞作咯，今日會接見建制派龍頭大黨民建聯同工聯會，唔知兩大愛國政黨會出幾多「柯打」，要求回報特首選舉時強力支持？但花生友聽聞佢同民主派嘅會面部署，卻因為民主黨胡志偉拋出「特赦和解論」、公民黨又跟車太貼而打亂咗，至今仲未有確實會面日子。
擬六四後始見面
花生友聽聞日前民主黨中委會上，有聲音要求六四後先見林鄭，似乎係等特赦論單嘢丟淡咗先，而據聞呢個delay決定，亦因為要時間諗清楚見林鄭時講乜；重啟政改、撤回8.31當然係例牌菜，雖然梁特、中聯辦對重啟政改吹淡風，據聞民主黨覺得呢個風只不過係期望管理，一於少理，見到林鄭一樣照提。
有民主黨人話林鄭當選後都有講正路嘢，所以先對佢疑中留情，重啟政改外，亦會要求林鄭喺管治新風上下工夫，例如唔好再只委任親政府人士。無獨有偶，因特赦論中箭嘅公民黨有相近諗法。
公民黨至今亦未定見林鄭嘅日子，但覺得以林鄭嘅性格，只係同佢講政制問題唔對嘴，相信喺講政改嘅同時就林鄭有興趣嘅話題同佢拗數，譬如新增50億元教育經常開支等，相信都可以有討論空間。
花生友