成立一年嘅香港眾志周六晚筵開卅幾圍慶祝一歲生日，當晚嘅表演活動多籮籮，但最搶眼嘅可能都係鍾情日本文化嘅周庭，佢拍住幾個青年義工表演跳結衣BB嘅「逃恥舞」，跳得有板有眼，獲嘉賓拍爛手掌。
「舞步都唔簡單」
八方問過周庭，原來呢次係佢首度登場跳舞，佢話就咁睇嚟，隻舞好似好易跳咁，但跳起上嚟卻似乎比想像中難，「其實啲舞步都幾多，唔係咁簡單㗎」。
佢話同班義工dancers都係喺黨慶前幾日，約埋喺放工或放學後喺眾志會址練舞，揀跳呢隻舞嚟表演都係為咗fun，尤其呢隻舞喺舊年好鬼紅、好多人識，而且對於佢哋冇跳舞經驗嘅人嚟講，總算比較容易學，「因為冇乜高難度動作」。對於呢次「處女作」，周庭謙稱仲有好多改善空間，總括嚟講都算OK嘅。
香港眾志秘書長黃之鋒、常委林朗彥等人亦唔執輸，先換晒紅煲呔吊帶西褲，表演拉一段小提琴，之後突然變晒風格，原來係rap改詞版嘅LMF《揸緊中指》，最後由主席羅冠聰壓軸大唱五月天嘅《倔強》，兼帶動全場大合唱，一歲生日快快樂樂收場。
李八方