見習騎師「火車潘」潘明輝又贏喇！沙田馬場今日（23日）第一場五班1200米泥地賽，葉楚航馬房處女馬「漸信名駒」之前23仗不勝，但今仗初配潘明輝即脫胎換骨，後上輕勝開齋，今場單Win及組合獨贏A1分別派38及16.5元。
5歲馬「漸信名駒」以往曾由雷神及潘頓兩大高手操刀，均最叻跑第二亦搞唔掂，反而今次用潘明輝有突破，藉3檔沿途守中前內叠好位，直路潘明輝從窄位中撬出空位，不慌不忙殺上，一騎即加速彈甩對手，大勝2.75馬位，馬兒取得服役首捷。
潘明輝在港只上陣三個賽日，俱有馬贏，暫已得四Win，且四場頭馬出自不同馬房，可見他廣受練馬師們歡迎。而葉楚航師傅、79歲的前練馬師簡炳墀今日罕露面撐徒弟，現身為「漸信名駒」拉頭馬。
今場二至四名順序「有福氣」、「盈喜悅」及「飛壹般」，四重彩派71,243元。