【本報訊】今日新盤垃圾房也計入樓面，其實地產商以前賺到盡招數也多不勝數，除賣窗台發水外，還有把頂層升降機機房的樓層也用作住宅樓面，變相多賺一層，令當年部份頂層戶變「奇則」，如唐樓般無升降機到。
有測量師指，當年啟德機場附近物業有高度限制，部份地產商為賺盡樓面，頂層住宅也要與升降機機房同處一層，因此部份頂層戶沒升降機直達。買家若住16樓頂樓，升降機只去到15樓，要行一層樓梯。
無𨋢戶頻錄成交
多個發展商包括長實、恒隆、太古及新世界等，多年前亦曾興建頂層無𨋢樓盤。現時全港多個私人屋苑的部份頂層戶均無升降機到達，除了九龍灣德福花園，還有黃埔花園、美孚新邨、城市花園等，就連薄扶林公屋華富邨，部份座別的頂層戶也無𨋢。
無𨋢頂層戶除上落欠方便外，搬屋或家中有長者也是一大問題，又可能有漏水問題，因此向來乏人問津，成交價一般比市價低5%至10%。惟樓價高企，無𨋢頂層戶變搶手貨，近期頻頻錄得成交，造價參差。
太陽物業宏惠強稱，自3月份以來，黃埔花園已錄得最少6宗頂層戶成交，其中10期4座B室頂層戶，成交價730萬元，呎價12,026元，比市價平近190萬元。而有𨋢的10期3座中層H室，今年2月以918萬元成交，呎價15,124元，貴無𨋢戶逾兩成。香港置業余柏稱，美孚新邨本月初錄兩宗頂層戶成交，其中6期吉利徑2號頂層戶售743萬元，屬市價。
■記者朱連峰