越來越多證券行上市，新近連富昌金融都已經遞交上市申請，想上創業板。講起富昌，大家都知公司主席係佳兆業（1638）大股東郭氏家族嘅郭俊偉。
富昌成立於1999年，有18年歷史，管理層都好資深，不過睇番佢哋本初步招股書，有位女執董只係30歲，即刻幫手拉低咗執董嘅平均年齡。
呢位30歲執董叫劉嘉兒，2008年港大畢業，2010年已經加入公司，今年2月升做執董，負責行政同營運，認真後生可畏。而佢加入富昌之前，做過兩年證監會人力資源部助理。
富昌另外4名執董，年齡介乎53至60，郭老闆56歲，平均54歲，加埋劉嘉兒，平均年齡就拉低到49歲嘞。
唔知呢位女執董將來會否幫公司做埋生招牌呢？