梁班子連日大合奏，齊齊唱好珠西大灣區，早前到訪大灣區嘅政務司司長張建宗出席香港賽馬會社群日時，竟然攞起樂器露兩手，唔通呢場珠西交響樂，唱好之餘都要動手？
查實張建宗係配合藝文共享呢個活動主題，同馬會主席葉錫安、行政總裁應家柏捧起夏威夷樂器Ukulele jam歌啫！官場眾所周知，張建宗嘅一項奇技係過目不忘，佢喺活動上亦展現功架，對馬會慈善信託基金嘅資助項目倒背如流，仲話雖然對賽馬認識唔多亦冇乜觀賽，卻係馬會「粉絲」，讚馬會支持慈善團體兼推動本港文化藝術發展，展現香港軟實力。
馬會喺活動中公佈慈善信託基金會喺啟發青年、長者安老同普及體育外，加入第四個慈善策略方向－－藝術文化及保育，除咗硬件建設、加強人才培育及致力活化古蹟等。