前年憾別英超嘅羅渣士，去到蘇格蘭球壇後做山寨王，繼去年捧走蘇聯盃同月初提早八輪奠定蘇超錦標後，周日又領軍喺蘇足盃四強嘅old firm打吡中，以2:0輕取死敵格拉斯哥流浪，睇嚟今季三冠王頭銜，應該都幾難走得甩。
輕取格流入決賽
些路迪喺呢場所謂蘇足盃四強激戰，贏得好輕鬆，11分鐘就由卡林麥基哥禁區外左腳熨射開紀錄。下半場，再由今季首席射手史葛冼佳亞操刀射入12碼，奠定2:0勝局，入決賽嘅係些路迪。決賽將會喺5月27日進行，而些路迪嘅對手會係聯賽二哥鴨巴甸。
愛情事業兩得意
雖然話鴨巴甸今季仲勁過格流，決賽鹿死誰手未知，但些路迪三冠王嘅呼聲已經高唱入雲，而更令大家估唔到係，羅渣士年幾前被利物浦炒魷時，人人仲笑佢無能，但𠵱家喺蘇格蘭就變到咁風光，受盡球迷愛戴；話就話些路迪喺蘇超球壇一隊獨大，要贏冠軍唔係咁難，但𠵱家成41場本土比賽不敗，如果到季尾仲保持不敗姿態捧走三冠王，就真係一時佳話。
事業得意之餘，之前畀人鬧拋妻棄子嘅羅渣士，同小三莎樂亦守得雲開，懶理外界點講，佢喺今年二月已經向莎樂求婚成功，仲要喺紐約畀人影到當眾單膝下跪求婚。情場從來冇啱定錯，我求大俠只係覺得佢𠵱家成個人生贏家咁，愛情事業兩得意；你再睇吓新特蘭嘅莫耶斯，同樣畀曼聯咁嘅大球會炒魷，𠵱家教到隊新特蘭九成九降班，咁我真係寧願揀學羅渣士咁，去蘇格蘭做土皇帝好過啦！