九西、新東預料今年暑假後補選，連續兩屆失老巢、九西地盤嘅民協，老將馮檢基同去年喺超選中棄選嘅新將何啟明，有意代表民協出戰。
民協何啟明噚日現身跨民主黨派舉行嘅遊行，佢表明反對「和解論」，但遊行隊伍未見同黨馮檢基身影。
何啟明話民協上周六開會，傾黨內初選問題，決定初選由民協中常委同於2015、2016曾代表民協參與區選、立法會選舉嘅人士，喺下月10日投票決定邊個出戰，民協今次唔會使錢、用只係打固網電話嘅民調作為甄選嘅方法。
何指黨內的確有年輕人接棒嘅呼聲，故對喺黨內出線有信心，但亦不能低估基哥同黨內人士嘅「感情因素」。佢話由於唔少民主派都想出戰九西，最終民主派或要來一次初選決戰，呢方面就要交畀民主動力處理。