楊千嬅、余文樂同導演彭浩翔噚日喺旺角宣傳電影《春嬌救志明》，千嬅着住7吋高踭鞋現身，三人齊齊同粉絲玩遊戲，仲拎住吹氣膠鎚敲落燈箱，寓意電影票房爆燈。之後樂仔又同彭浩翔大講有味笑話，彭浩翔陰陰嘴笑住話：「今日喺商場度扑嘢呀？」樂仔就同千嬅講：「扑嘢呀，冇辦法啦春嬌，扑到爆呀。」千嬅即喝止二人話：「夠啦！」千嬅接受訪問嗰陣，就話已習慣同佢哋互寸：「我𠵱家面皮厚過鞋底，耳仔已經麻木晒。」彭導就話：「我哋唔講鹹濕嘢會唔舒服，嗰日好似未完，仲爭啲嘢咁。」
食錯嘢腳軟
其間，樂仔就冇乜出聲，原來佢喺上海宣傳時食錯嘢，彭導即再寸樂仔話：「係咪食錯咗啲後生女、細路女呀？」樂仔完全無力反擊，淨係話：「隨便你哋講啦。」千嬅就話：「見到佢咁，個心好爽又好肉赤。」在活動上，二人一時笑千嬅着高踭鞋「Elegant」，一時笑佢係「中女」，千嬅講明唔會嬲，佢話：「他朝君體也相同，唔會動搖到我情商，佢哋用廣東話講得直接，之前喺內地用普通話係講得優雅啲，話要陪我度過更年期，有幾多男人可以陪女人過更年期呀？所以係嬲唔落，仲有啲感動。」
撰文：馮仁昭
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw