4支下周中需要出戰亞冠盃嘅中超球隊，周五晚提早上演聯賽秩序，其中下周二作客旺角場對東方龍獅嘅廣州恒大，主場迎戰中下游球隊遼寧宏運，66分鐘有王上源疑似禁區外拉跌對手被罰黃牌，但球證竟然直指12碼，呢位23歲球員因為投訴變相兩黃一紅被逐，宏運射入極刑領先1:0。不過，恒大打少一個下仍然憑郜林頭槌同列卡度高拉特射入12碼反勝2:1，6戰得13分繼續排第2，落後廣州富力3分。
不過，恒大球員喺最後10分鐘反先後，唔少球員頻頻倒地藉故拖延時間，遼寧教練馬林賽後亦公開發炮：「恒大絕對係中超超一流嘅球隊，但恒大嘅演技都係一流，尤其係最後10分鐘。我覺得呢種表現有違公平競賽精神。」面對敵軍指控，恒大教練史高拉利亦不甘示弱：「我覺得（對方嘅講法）好搞笑，遼寧隊做咗80分鐘咁樣嘅事情，我哋只係8分之一嘅時間而已。」