英冠球隊白禮頓周一先篤定來季升上英超，風流過後似乎要嘔番啲運氣出嚟，周五聯賽作客諾域治淨吞兩蛋，想提早捧盃要hold住都未算慘，最慘係兩球竟然係「倒模」式擺烏龍，受害者係門將大衛史托達，好似經歷一場Deja vu噩夢咁！
諾域治喺18分鐘開紀錄，中場阿歷士柏列查特禁區外起腳，個波中楣後反彈史托達背脊入網……佢哋喺39分鐘拉開比分，中場阿歷士柏列查特禁區外起腳，個波中柱後反彈史托達背脊入網……嗱，唔係呃稿費呃字數，而係兩球烏龍波真係9成似，唔同嘅只有中柱同中楣、龍門右邊同左邊嘅分別。更有統計顯示，英格蘭球壇今屆只有兩位球員一場波擺兩球烏龍，除咗今場波嘅史托達，另一位就係隊友沙恩杜菲……擺烏龍擺到咁都一樣升班，絕對係實至名歸啦。