今日太陽勁猛身水身汗，本學堂主席陳榮禮（Eddie）說請我們喝汽水，說罷就左手抱起隻蛋，右手抽着太陽能板，走到艷陽下的單車徑開壇──曬汽水！「呢個係太陽能雪櫃，太陽越曬越熱，佢就越凍，但點都要等幾個鐘儲夠電，慢慢等啦。」呃，冰品無益，我飲水喉水得喇。
Eddie是退休人士，專用撿回來的舊零件，挑戰超廉價再生能源電器，誓要環保救地球。早年他創作過踩單車發電機，現向太陽能、風力、水力發電等方向進發：「我好希望喺餘下時間，發展一啲市民大眾可以自己動手又平價嘅可再生能源生產方法。」好喇，現在有請他的「訩你命三千2.0」系列出場──
1.研究編號omg3001：便攜式烈焰震蛋Unplugged
即是上述的土炮太陽能雪櫃，理論上太陽越曬氣溫越高，雪櫃就越凍。
2.研究編號wtf3003：孤獨的汽水冷凍器
話說有次朋友挑機，說不喝高過攝氏7度的熱啤，又笑他創作的便攜式烈焰震蛋Unplugged：「咁大個雪櫃連成打汽水，要阿諾舒華辛力加先揹得起啦。」為此，他就拆幾部廢棄電腦的散熱扇降溫，研發成這個輕便版wtf3003孤獨的汽水冷凍器，不過一罐是極限，Eddie：「小太陽能板，小控制器同小電池，可能係世界上最細嘅雪櫃。不過如果塊太陽能板細咗，就要再曬耐啲先夠凍。我試過好多部散熱扇喇，如果搵到把更強力嘅風扇，一定可以成功降溫。我目標係可以揹個雪櫃喺背脊，塊太陽能板就晾喺頭頂吸光擋太陽，好似《倩女幽魂》裏面嘅張國榮寧采臣)咁呢。」望住講得興奮的他，曬到青筋都現埋，我與攝影師腦裏響起背景音樂：「人生路......」但畫面有啲海市蜃樓。
3.研究編號on9001：巨型水力迷你發電機
Eddie：「國內好流行，沖涼嗰陣開發電機，利用水力點着一支燈，沖澡嗰陣唔使黑媽媽。」兩個大水樽，沙漏式嘴對嘴接駁，樽口裝淘回來的小型發電器，當流水猛地衝過，啟動電能亮燈，水力越大，燈泡越亮，「第日整埋個沙漏架，等佢漏完一次水可以返過嚟再漏一次，永續循環。」說罷倒水，水緩慢地流，那個具5伏特電流的發電機與3伏特電的燈泡，一片寂靜，他笑笑：「之前出術用水喉射佢就得，仲好光，依家水力真係唔夠，就......唔太Work。」望來望去鍥而不捨，「我跟住會加高個樽，加多啲水多啲水壓......（下省三百字）應該可以。」
4.研究編號C0.5：訩你命停車熄匙冷氣機
Eddie：「原則上呢個係太陽能車廂冷氣，但只可吹一陣。」他的小貨車，車頂有兩大塊太陽能板，後車窗有兩個大風扇，連結兩條去水喉從後座爬到前座。停車熄匙之時可以為車廂降溫，時效約20分鐘。拍攝當天早上才剛弄好的，所以開關掣仍只是兩條電線，掂一掂着機，涼風吹來，把曬到有攝氏61.5度的高溫車廂，一下子暴跌十多度，是完成度最高且最爽皮的傑作。
一切都是實驗性質，似乎得啖笑，惟試驗間總有新發現。雪櫃、燈泡、冷氣機，除了小量零件及太陽能板是買的（可以回收他都回收），其他統統回收再造。成本可是正正經經訂一套幾萬元太陽能裝置的百分一，甚至更少。我們笑他on9001，他以回收品為朋友的農莊製作太陽能降溫系統，「有時你唔一定要用好純淨好穩定嘅能源，例如散熱扇，太陽猛，散熱扇就行快啲，太陽弱就行得慢，反正都唔需要。」衡量所需，自可省回許多貴重儀器的部份與追求，「我唔係正式科學家，如果我乜都俾錢買，喺實驗室落單，我覺得咁唔夠叻。我向自己挑戰，我執番嚟整嘅嘢都好過你，先係我想做到嘅嘢。」
記者：陳慧敏
攝影：許先煜
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw