喺特首選舉中以高民望落敗嘅薯片叔叔、前財爺曾俊華，因為一場選戰，廣結良緣，前晚頭號薯粉自由黨榮譽主席田北俊就為佢搞咗場知名薯粉聚會，並預祝噚日66歲嘅薯片叔生日快樂，其間「3T黨」即係薯片叔叔（John Tsang）、田少（James Tien）同立法會前主席曾鈺成（Jasper Tsang）同台合唱《沉默是金》，唱到「笑罵由人 灑脫地做人」相視而笑，有乜意思就大家心照啦！
呢場星光熠熠嘅慶生飯局由田少發起，除咗薯片叔家人等，仲有各黨派人士出席，挺曾嘅泛民好捧場，民主黨涂謹申、公民黨楊岳橋同郭榮鏗、公專聯莫乃光同梁繼昌等都有出席，近日退出新民黨嘅田北辰亦係座上客，但八方就更關注廳裏愛人一對對，李鵬飛同飛嫂雙雙捧場，據知AY亦攜同女友出場，唐英年亦同太太郭妤淺現身，而同樣在場ABC陣營嘅港視主席王維基，就同傳過緋聞嘅總商會總裁袁莎妮一齊坐。
除咗籌組3T黨獻唱，薯片叔亦同瞓身支持佢嘅泛民人士合唱羅文嘅《幾許風雨》；喺飯局尾段，田少同薯片叔嘅囝囝曾雕龍仲送上surprise，預備咗一個有薯片叔叔肖像嘅生日蛋糕，然後全場大合唱Happy Birthday，場面好溫馨！
未決定去向「想唞吓先」
壽星佬薯片叔噚日喺facebook貼咗蛋糕相，多謝大家祝福，仲話啱啱睇咗近期上映嘅電影《A United Kingdom》（愛無懼色），大讚感人同有啟發性。
八方打聽下發現，唔少賓客對薯片叔去向表示關注，有打探過嘅賓客引述薯片叔嘅席間話，至今未決定，只稱「想唞吓先，以前（政府任職時）日日都要6點幾起身，𠵱家難得可以日日瞓到9點幾！」似乎仲想Hea多陣先。
李八方