萬眾矚目兼直接關乎西甲錦標誰屬嘅「國家打吡」周日就會喺皇家馬德里主場巴拿比奴爆發，一向口多多嘅巴塞隆拿後衛碧基就算早一日喺歐聯8強俾祖雲達斯淘汰，依然喺twitter轉載一單巴塞球迷不離不棄繼續為球隊歡呼嘅新聞，攞嚟諷刺皇馬球迷平時對球隊噓多過讚：「聽吓魯營球迷點樣繼續為出局嘅愛隊歡呼。佢哋（皇馬）就算晉級都好，咪一樣聽到喝倒采……」
不過，碧基收到呢個消息後，唔知仲有冇咁寸呢？因為巴塞前鋒尼馬早前喺對馬拉加嘅聯賽兩黃一紅被逐後，被指拍掌諷刺第四球證而被加刑兩場，球會諗住拖到最後一刻先為佢上訴，諗住一打甩就可以令佢踢到國家打吡，點知西班牙足總上訴委員會周四正式駁回上訴，意味巴塞周日作客唔使預尼馬啦。