昨日講起政府年金，左丁山認為幾適合（一）65歲身體正常，健康無礙，好有機會存活到85歲（男性），87歲（女性）之人，（二）平時有積蓄，但又唔係有幾千萬元未開頭之人，譬如有四五百萬存款在銀行，（三）平時不懂得積極投資、識賺日日鮮、認為自己炒股搵銀叻過陳德霖，（四）已有公屋，或居屋，或私樓已供滿按揭嘅。
有齊上述四項條件，俾一百萬香港按揭證券公司揸住，每月穩定收番五千零蚊，其他三百萬元分別買高息股或商業信託或地產信託投資基金，每年收息起碼五厘，一共收回十五萬元股息，加近七萬年金發放，加埋有接近二十二萬元，即每月穩定收入一萬八千三，到70歲再攞生果金每月千三，到時都怕夠退休生活所用啩，如果唔夠，趁樓價高再搵按揭證券公司做埋逆按揭，每四百萬樓價可大約每月得一萬左右，於是加加埋埋每個月有三萬元現金，一位70歲長者夠唔夠用？
此乃中產階級退休方案，政府透過按揭證券公司向長者提供年金及逆按揭（安老按揭），係變相提供中產福利，其他如銀髮債券，ibond亦然，雖然唔係好大着數，但中產人士退休前交過咁多稅，退休後唔攞番啲通有福利，似乎對唔住自己。其實政府即使通派，得益人數亦唔會有好多，好似年金咁，上限總額係一百億元，單位認購上限係一百萬元，即係一萬人就可以買晒！陳茂波司長話可以考慮擴大總額喎，仲未有定案，左丁山就認為年金一推出就會爆額，有意認購之人千萬不可怠慢。記得幾年前第一次推出ibond，竟有投資專家唱淡，於是大手認購之人，獲配幾十萬，財息兼收，笑到四萬咁口，到第二批ibond推出嘞，一啲唱淡專家唔敢再出聲，於是申請踴躍，最多只得一手，變成冇肉食咯。今勻又聽到一啲社運界人士唱淡，話申請年金冇着數，壽命未必有咁長，買樓收租好得多，買高息股票仲有靈活性，通脹難以預測，隨時加息等等等堂皇理由。唔敢話佢地唔啱，事實上買年金係有通脹風險，但退休買年金並非一注押晒落去，而係從退休本金中分一百萬元買入啫，買其他產品咪一樣有投資風險！假若唱淡聲音愈來愈大，買年金係最好機會，梁振英做完五年特首，最大功勞係推高樓價五成及觸發小撮人搞港獨，呢次向中產退休人士臨別送禮，卻之不恭也。
緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw