立法會財委會噚日開會討論係咪向迪士尼注資50多億元擴建，由於部份建制派都唔支持，議案未算有十足把握過到關，而支持撥款嘅自由黨飲食界議員張宇人，唔知係咪想幫手拉票？噚日特別喺迪士尼酒店嘅新餅房，買咗40個有迪士尼公仔造型嘅西餅，話要請開會嘅同事食。
莫乃光：係咪翻版嚟㗎
民建聯葛珮帆見到啲餅，一開始就覺有啲唔妥咁問：「迪士尼請我哋食餅咁大鑊？」張宇人即時派定心丸：「係我請你哋食餅呀！」，先令葛珮帆定番些少。
張宇人之後嘗試搵白鴿黨黃碧雲食餅，但黃碧雲一睇到，即刻大嗌：「好飽喎，唔食！」仲笑張宇人身形肥到似身懷六甲，之後就拔足離開。張宇人其後再捉莫乃光入房食餅，莫乃光一見啲餅即刻問：「係咪翻版嚟㗎？」果然好關注版權；當知道啲餅嚟自正版迪士尼時，佢就話：「唔使嘞，我肥呀，太肥呀！」力抗西餅誘惑。